Cangianu i tempi, signori beddhi.
E assema ad iddhi cangia puru u tempu, ca benadica chjova cchi mancu i cani, tira ventu comu non mai e frana tuttu, cosi mai visti.
Sti cosi capitannu pecchì non si mu preparati, pecchì facimu i cosi all'ammuzzu, pecchì a nui , a ncunu 'e nui, ni piàcia ma ni lamentamu, doppu cchi succedanu i cosi.
L'aviavu mai visti i strati renduciuti 'e sa manera, ca ogni caforchju ci capa n'autotrenu? Eu mai, eppuru...I cosi cangianu,...cangianu!
L'unica cosa cchi non cangia mai simu nui catanzarisi, sempa "pigghjati d'a gola", sempra troppu occupati, sempra gargiuti e pronti ma dicimu 'a nostra, e mai ma si pigghjera na decisiona quando serva. Nui restamu "semper fidelis" a comu eramu na vota. E non c'è nenta cchi ni fa cangiara.
U catanzarisa DOC (Ditteriu d'origina catanzarisa) è chiddhu cchi dicia: "Eh, si cci penzava prima..." "Eh, si mi nd'accorgìa prima..." "Mò ormai è tardu..." "Si cosi s'hannu 'e fara chjanu chjanu..." senza ma s'apprica, poi, ppemma risorva u problema cchi l'angoscia, ppemma fa 'ncuna cosa ma cangia na questiona.
'U problema cchjù importanta, è ppemma potimu parcheggiara subba u corzu, sutta i vitrini d'e negozi, ca si facimu tri passi a peda ni stancamu e non s'accorgia ca Janò si nda sta scindendu "pisola pisola", 'a benzina 'e Piterà sprofondau, e a Lidu...
A la Marina effettivamenta non capitau nenta ancora, ma tantu nui catanzarisi non è ca n'appricamu.
Avimu, a su momentu, nu saccu 'e penzeri pp'a capu, non è ca potimu vidira...
...E poi, si non ni potimu lamentara, cchi cagni 'e catanzarisi simu?
Nessun commento:
Posta un commento